ПАРТИЯ "РОДИНА" В МАРИЙ ЭЛ

ЦЫМЫР РОССИЙӸШТӸШӸ

«РОДИНА»

ПОЛИТИКА ПАРТИН ПРОГРАММЫЖЫ

 

«РОДИНА» ПАРТИ цицмӓш организационный дӓ политический самостоятельностьшым пӧртӹлмӹ гишӓн шижтӓрӓ. Мӓ политикӹн кредӓлмӓш аренӹш социал-патриотизм знамя доно мӹнгеш толына.

«РОДИНА» ПАРТИН цилӓ документшӹ дӓ программа семӹнь заявленижӹ Дмитрий Рогозинӹн вуйлатымы жепӹн ӹштӓлтӹн. Тидӹм шотыш нӓлӹн, партинӓн тагачшы кечӓш тӹнг направленивлӓжӹм пӓлдӹртен кодаш келеш манын шотленӓ.


Остатка лу и лошты сӓндӓлӹк вӹлнӹ кымдыкеш нелӹлык шӓрлӹмӹ каеш. Тӹдӹ халыквлӓ лошты иктӧр укелык келгеммӓш, тошты политикӹн виктӓрӹмӹ механизмвлӓжӹн пайдалыкышты лаксыргымаш, силовой конкуренцин формывлӓжӹн геополитический кӱкшӹцӹштӹ когон виӓнгмӓш, энергим пушы ресурсвлӓ верц кредӓлмӓш доно кӹлдӓлтӹн.

Неволя ӹштӹктӹмӹ лиӓлтмӓшвлӓ кӹзӹтшӹ эдемвлӓлӓн яжон пӓлӹмӹ ылыт дӓ нӹнӹ тидӹм кечӹньок, манаш лиэш, ужыт. Тидӹжӹ овуца семӹнь ванжышы морально-нравственный пайдалыкым, кӹзӹтшӹ обществын пуры шижмӓшӹм ямдымашкы канда.

Финансово-экономический, социальный дӓ политический кризисӹн когоэм шалгымаш кӹзӹтшӹ цивилизацин анзыкылашы ядмашвлӓлӓнжӹ ӹнянӹдӹмӓшӹм шачыкта.

Россий кугижӓншӹ ӓкрӓм годшенок айыртемӓлтшӹ цивилизаци семӹнь чангалтын. Тӹдӹн негӹцӹштӹжӹ духовный пайдалык материальный гӹц кӱшкӹ шӹндӓлтӹн. Патриотизм, сакой халыкын ӹшке овуцаштым шотеш пиштӹмӓш кого вӓрӹм нӓлӹнӹт. Цилӓ сӓндӓлӹк вӹлнӹшӹ тагачшы кризис Россий халыкын национальный идентичностьланжы, сӓндӓлӹкӹштӹ держава семӹнь ылшы Россий Федерацин суверенитетлӓнжӹ кого лӱдӹшӹм канда, халык лошты нелӹлыкым когоэмдӓ дӓ мӓмнӓн шергӓгӓкӓн цивилизацинӓм, кыдын лӹмжӹ – Россий!, ытараш манын, кугижӓншӹ гӹц кӹзӹток ӹштӹшӓшлык керӓл мерӓм пингӹдемдӓш тергӓ.

Сӓндӓлӹкнӓн гражданвлӓжӹлӓн цымыр нацийӹн патриотический идеологи негӹцеш иквӓреш ушнаш, тенгеок вӓш кӓнгӓшен келӹштӓрӹмӹ социально-политический интерес келеш, вес семӹньжӹ, политический нацим ӹштӹмӹлӓ. Мӓлӓннӓ тидӹ, сек пӹтӓриок, эдемвлӓн, Россий гражданвлӓн, иквӓреш ылмаш, кыдывлӓ «ире вӹрӓн» манмы доно агыл, а икань кӧргӹ шӱлӹш, йӹлмӹ, культура, ик истори дӓ мӱлӓндӹ доно ушненӹт.

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ ӹшке программыштыжы Российӹн кӹзӹтшӹ условиштӹ виӓнгмӹ стратегин тӹнг задачывлӓм пӓлдӹртен. «РОДИНА» ПАРТИН программыжы – тидӹ XXI курымын ядмашвлӓэш российӹштӹшӹ вӓшештӹш, кӹзӹтшӹ национально-патриотический иделогин тӹнг шанымаш.


I. ЖЕПӸН ТЕРГӸМӒШЕШ РОССИЙӸШТӸШӸ ВӒШЕШТӸШ

 Мӓ цат пӓленӓ, у национально-патриотический мировоззренин негӹцшӹ кым тӹнг принцип гӹц лишӓшлык ылеш:

  •  ХАЛЫК КУГИЖӒНШӸ. Власть дон халык лоштышы кӹлӹм Российӹн цымыр халык доно келӹштӓрӹмӹ стратегический национально-патриотический интересвлӓм шотыш нӓлӹн чангаш келеш. Цицмӓш анжалмашты, кугижӓншӹ, класс дӓ общество, хоть-ма лиэш гӹнят, икӹжӓк-иктӹштӹ ваштареш шалгышашлык агылеп. Малӓннӓ социальный дӓ национальный келшӹмӓш – тидӹ обществышты ӹлӹмӹ закон.
  •  НАЦИВЛӒН УШНЫМАШ. Россий халык овуца, икӹжӓк-иктӹм шотеш пиштӹмӓш дӓ икань пӓшӓ доно ушнышы политический наци лишӓшлык ылеш.
  •  ТУАН МӰЛӒНДӸ. Россий территорин цицмӓшлык, эдемвлӓн праваштым дӓ соотечественниквлӓн национальный достоинствыштым кымдыкеш перегӹмӓш – тидӹ мӓлӓннӓ нима донат тӓнгӓштӓрӓш лидӹмӹ пайдалык. Ӓкрӓм годшен Российӹн ылшы мӱлӓндӹвлӓм кредӓлдеок цымырымашымат яжоэш шотленӓ.

 

1. Халык кугижӓншӹ

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН шанымыжы семӹнь, сӓндӓлӹкнӓн тӹнг проблемӹжӹ – виӓн, пайдам пушы Россий кугижӓншӹм ӹштӹмӓш дӓ виӓнгдӹмӓш, кыды гражданвлӓлӓн яжо ӹлӹмӓшӹм пуэн кердеш дӓ халыкым шукемдӓш палша. Тидӹ овуцалан ӹнян ылмым дӓ футуризм вим ушен шалгышы тӹрӹснек халык кугижӓншӹ лишӓшлык ылеш.

У, пӹсӹн вашталтшы геополитический дӓ социально-экономический реали, политикӹштӹ келшӹдӹмӓш когоэммӓш (сакой политический ви лошты торешлӓнӹмӓш виӓнгмӓш, обществын шелӓлтмӓш, властьым цилӓ монгыр гӹц цат пӹзӹрӹмӓш, профессиӓн вуйлатышы кадрвлӓн дефицит, раш формулируйымы сӓмӹрӹквлӓн политика укелык) виӓн дӓ пайдам пушы кугижӓншӹм ӹштӓш манын, кӹзӹток ӹштӹшӓшлык мерӓвлӓм пингӹдӹн тергӓт.

Анзыкылашы жепӓш сек керӓл задача – общество дон кугижӓншӹм национально-патриотический ушнымаш дӓ социальный келшӹмӓш негӹцеш мирейӹктӹмӓш. Халыкын интересвлӓжӹм кугижӓншӹн керӓллыкеш жертвыш пумы веремӓ шайылан кодшашлык ылеш. Тагачы гражданин дон власть лоштышы кӹлӹм коголяныштат лӓктӹшӓн ылшы принцип доно чангаш келеш. Тӹдӹн тӹнг цельжӹ – халыкым перегӹмӓш, ӹлӹмӓш иготым дӓ качествым лӱктӓлмӓш, тетя шачмашым шукемдӹмӓш, эдем дон гражданинлӓн кушкашышты условивлӓм ӹштӹмӓш.

XXI курымаш Россий техень сӓндӓлӹк лин кердеш, кыдын гражданвлӓжӹ «Кугижӓншӹ – тидӹ мӓ!» манын когоэшнен попышы праваан лит.

 

 2. Нацивлӓн ушнымаш.

Кугижӓншӹн сек керӓл задача – Россий халыкым ик политика нациш цымырен ушымаш. Тагачы вашталтдымашлан дӓ обществылан виӓнгӓш гражданвлӓм наци пӓлӹк доно айыркалымаш мешӓйӓ. Цымыр нацин идентичностьшым пӹтӓрӓш цацымаш йӓлӹнӹм тырхен керддӹмӓшӹм, цӓрӓш лидӹмӹ национализмӹм, религи лоштышы кредӓлмӓшӹм кушта.

Йӹлмӹ дӓ культура – Россий Федераци халыкын национально-патриотичекий ушнымаш негӹц ылыт.

Кӹзӹтшӹ веремӓн Российӹштӹшӹ культура техень лӓктӹшӓн негӹц, кыштакен у руш-еврази иканьлыкын цаткыды пушӓнгӹ кушкын дӓ цаткыдемӹн.

Россий цивилизаци духовно-нравственный пайдалыкеш негӹцлӓлтеш. Тӹдӹ обществышты ылшы сӹмӹрӹшӹ процессвлӓ ваштареш кычылташ лимӹ лач ик оружи ылеш.

Россий Федерацин светский сӹнӓн ылмыжым дӓ совестьлӓн ирӹк конституцин принципӹм шотышкы нӓлӹн, «РОДИНА» ПАРТИ, тенге гӹнят, кугижӓншӹн сек пӹтӓришӹ пӓшӓэшӹжӹ духовный негӹц перегӹмӓшӹм шотла.

Российӹштӹшӹ шукы национальностян халыкын духовностьым дӓ культурым угӹц лӱктӓлмӓш – ик политический нацим ӹштӹмӓштӹ сек керӓл услови ылеш. Нацивлӓ лоштышы культура кӹлӹм пропагандируяш дӓ виӓнгдӓш, кугижӓншӹн национальный политикӹжӹн тӹнг шанымашыжы семӹнь кого Россий семняшкӹ пырышы цилӓ этносын вӓш келӹштӓрӹмӹ позицим йӓмдӹлӓш келеш.

3. Туан мӱлӓндӹ.

Гражданвлӓн лӱддӹмӹлык дӓ сӓндӓлӹкӹн экономика шотышты виӓнгмӓш – цивилизацинӓн негӹцшӹ ылыт.

Россий территорин цицмӓшлыкшым перегӹмӓш принцип, кугижӓншӹн цицмӓш верц кредӓлмӓш – каждый лачокшы патриотын сек керӓл задачыжы ылеш. Мӓлӓннӓ анзыцшы поколени гӹц кодшы дӓ тьоти-папивлӓнӓн вӹрӹштӹ доно мышкылтшы туан мӱлӓндӹ – цымыр халыкын паянлыкшы. Мӓмнӓн долгна – тӹдӹм перегӓш дӓ анзыкылашы шачшы-кушшывлӓлӓн пуаш.

Тагачы «РОДИНА» ПАРТИ политикӹн кредӓлмӓш аренӹш «Йымы – пӹлгомышты, Россий – мӱлӓндӹштӹ!» лозунг доно лӓктеш.


 

II. ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН ПРОГРАММЫЖЫН ТӸНГ ПРИНЦИПВЛӒ:

 1. Нацим перегӹмӓш

Халыкым пакылаат чӹдемден шалгымаш Российӹм социальный деградацишкӹ дӓ тӹдӹн территорижӹм шӓлӓнӹмӓшкӹ канден кердеш. У либерализм идеологвлӓ хоть-кыце «ладнангдараш» цацат гӹнят, шукы эдемӹм ӧрдӹж гӹц кандымы доно халыкым переген кодымы проблемӹм решӓш акли. Халыкым перегӹмӓш, гражданинвлӓн ӹлӹмӹ иготым дӓ качествым лӱктӓлмӓш, обществым физически дӓ нравственно шулыканым ӹштӹмӓш –кугижӓншӹн сек тӹнг пӓшӓжӹ!

 «РОДИНА» ПАРТИ кугижӓншӹн демографи политикӹн техень направленивлӓм анзылтышывлӓэш шотла:

  •  Нацим перегӹмӓш. Халык – сек шергӹ пайдалык.
  •  Национальный патриотизм идеологин сек керӓл принципшӹ – кугижӓншӹн семнялӓн палшымаш. Тетявлӓ сӓндӓлӹкӹн сек тӹнг пайдажы ылыт, нӹнӹм анжымаш – кугижӓншӹн сек пӹтӓришӹ задачыжы. Обществышты ӓвӓ лимӓш культым угӹц луктӓлӓш, шукы тетяӓн семнявлӓм жеплӓш дӓ шотеш пиштӓш, нӹнӹлӓн окса шотышты палшаш келеш.
  •  Сӓмӹрӹк семнявлӓлӓн палшымы комплексный федеральный программа: процентдӹмӹ потребительский кредит, вес тетя шачмылан кӱсӹн пумы окса гӹц икманярыжым тӱлӹмӓн ипотека, пӓшӓм ӹштӹшӹ ӓтя-ӓвӓлӓн уштарен оксам тӱлӹмӓш.
  •  Ӹшкетӹн тетям анжышы ӓвӓлӓн ӓли ӓтялӓн цилӓ шотыштат палшымаш (ӹлӹмӓштӹ тамаат лиӓлтеш, седӹндоно ӓвӓвлӓлӓн веле агыл, ӓтявлӓлӓнӓт тетям ӹшкетӹн кушташ вӓрештеш).
  •  Тылыкеш дӓ томаде кодшы тетявлӓн проблемӹвлӓм решӹмӓш. Техень тетявлӓм семнявлӓшкӹ эргӹлыкеш дӓ ӹдӹрлыкеш нӓлмӹм виӓнгдӓш дӓ нӹнӹлӓн палшаш келеш. Российӹштӹ шуэн кодымы тетявлӓ лишӓшлык агылеп.
  •  Сӓмӹрӹквлӓн лӓктӹшӓн кугижӓншӹ политика. Кушшы поколеним патриотизм дӓ духовно-нравственный шӱлӹш доно анжен кушташ манын, цымыр федеральный программым ӹштӹмӓш дӓ ӹлӹмӓшкӹ пыртымаш.
  •  Шулыкан ӹлӹмӓшкӹ дӓ физкультура доно кӹлӹм кычаш ӱжмӓш. Спорт – цилӓлӓн!
  •  Молнам СССР-ӹн ылшы сӓндӓлӹквлӓ гӹц ӹшке Родинӹшкӹштӹ толаш дӓ Россий гражданствым нӓлӓш шанышывлӓм ваштымы кугижӓншӹ программым ӹлӹмӓшкӹ пыртымаш. Тидӹн годым раш механизмӹм ӹштӓш келеш, кыды тӧр дӓ пӓшӓ ӹштӓш мастар гражданвлӓлӓн яжо йӧнӓн режимӹм пуа. Россий гражданствым сек анзыцок наукын дӓ промышленностьын у отрасльвлӓштӹ пӓшӓлӹшӹ специалиствлӓ нӓлшӓшлык ылыт.

 

2. Национальный политика

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ кугижӓншӹ национальный политикӹм Российӹштӹ ӹлӹшӹ халыквлӓн овуцавлӓштӹм вӓшлӓ шотеш пиштӹмӓш принцип доно ӹштӓш, кого Россий семняшкӹ пырышы цилӓ этносын иктӧр праваан ылмыштым шотлаш келеш манын шана.

 Национальный политикӹн тӹнг направленивлӓжӹ техеньӹ лишӓшлык ылыт:

  •  Патриотизм дӓ халык цицмӓшлык принцип доно ик политический нацим ӹштӹмӓш.
  •  Федеральный, региональный дӓ вӓрӹштӹшӹ кӱкшӹцӹштӹ Российӹн цилӓ халыклан иктӧр правам пумаш.
  •  Тӧр дӓ келшен толшы представительвлӓм кугижӓншӹ властьын органвлӓш дӓ вӓрӹштӹшӹ самоуправлениш колтымаш.
  •  Кугижӓншӹн дӓ обществын ви доно национальностьвлӓ лоштышы конфликтӹм анзыцок шижтӓрӹмӓш. Вӹр якте шошы кредӓлмӓшӹм «бытовой соредӓлмӓш» манаш ӹнжӹ ли манын, этнос доно кӹлдӓлтшӹ проблемӹвлӓм ӹлянӓш тӹнгӓлмӹштӹ годымок карангдымаш.
  •  Гражданвлӓлӓн Россий халыкын культура паянлыкым перегӹмӓштӹ кугижӓншӹн палшыкым пумаш, национальный культурывлӓ лоштышы кӹлӹм виӓнгдӹмӓш.
  •  Россий Федераци территорин цицмӓшлык – нима донат тӓнгӓштӓрӓш лидӹмӹ пайдалык. Тӹдӹм, шамакат уке, кугижӓншӹ дӓ обществыштышы цилӓ шулыкан ви перегӹшӓлык ылеш.
  •  Россий гражданинвлӓм духовно дӓ нравственно кушташ манын, кугижӓншӹ концепцим ӹштӹмӓш дӓ ӹлӹмӓшкӹ пыртымаш.

Россий Федерацин национальный политикӹжӹн тӹнг направленивлӓжӹ сӓндӓлӹкӹштӹшӹнӓ Российӹн шукы иӓш историштӹжӹ кугижӓншӹм ӹштӹмӓштӹ кого рольым мадшы цилӓ халыкын ӹлӹмӓшлӓн керӓл интересӹштӹм шотышкы нӓлӹн ӹлӹмӓшкӹ пырталтшашлык ылыт.

«РОДИНА» ПАРТИ национальный дӓ расовый дискриминацин нимахань формыжымат яжоэш ак шотлы, тенгеок нацивлӓ дӓ религивлӓ лоштышы келшӹдӹмӓшӹм ӹлӹжтӹмаш, ик этосын весӹ гӹц яжорак ылеш манын увертӓрӹмӓш ваштареш ылеш. Тидӹн годымок, кугижӓншӹ экстремизмӹм цилӓ шотыштат сӹнгӹшӓшлык дӓ яшток пӹтӓрӹшӓшлык манын шотленӓ. Гражданвлӓн национальный достоинствыштым нима шотыштат валташ, тенгеок историштӹ ылшы фактвлӓм алтален анжыкташ, Россий халыкын традициционный ӹлӹмӓшӹжӹн морально-нравственный дӓ религиозный нормывлӓм шотеш пиштӹдӹмӓшлӓн волям пуаш ак кел.

Кугижӓншӹ миграционный политика кого значениӓн ылеш. Сӓндӓлӹкӹшкӹнӓ вескид кымдемвлӓ гӹц пӓшӓ ви толмаш цат тергӓлтшӓшлык дӓ кугижӓншӹн экономикӹжӹлӓн керӓл лишӓшлык ылеш, а стихийно ӹштӓлтшӓшлык дӓ коррупци доно кӹлдӓлтшӓшлык агыл. Сек анзыцок пӓшӓ вӓрвлӓм ӹшке халыкланна пумыла.

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ Российӹштӹшӹ цилӓ халыкын интереслӓн келшӹшӹ лӓктӹшӓн национальный политикӹм, сӓндӓлӹкнӓн вашталтдымашты дӓ яжон виӓнгмӓштӹ ик сек керӓл условилӓн шотла.

 

3. Национальный лӱддӹмӹлык

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ Вооруженный Виштӹ срочный служымаш – Россий Федерациштӹшӹ гражданинӹн почетный обязанностьшы дӓ конституционный долгшы ылмы шанымашеш негӹцлӓлтеш. Анзыкыла Россий Армин цицмӓш профессиональный негӹцӹш ванжен кердмӹжӹм шотыш нӓлӹнӓ. Тенге гӹнят, мӓ реалист ылына дӓ ынгыленӓ: кӹзӹт Россий Федерациштӹшӹ Вооруженный Вин личный составшым яралтшы принцип доно цымыраш келеш. Тидӹжӹ сӓндӓлӹкӹштӹшӹ экономикӹн ситуаци дӓ кӹзӹтшӹ геополитический реали доно кӹлдалтӹн.

 Тидӹн шотышты «РОДИНА» ПАРТИ национальный лӱдӹш ӹнжӹ ли манын, техень мерӓвлӓм ӹлӹмӓшӹш пырташ келеш манеш:

  •  Вооруженный Вим бюджет оксаэш кычымаш.
  •  Отечественный оборонно-промышленный комплексӹн когон виӓнгмӓш, тӹдӹн негӹцеш у технологим ӹштӹмӓш дӓ ӹлӹмӓшкӹ пыртымаш. Нӹнӹ военный секторыштат, граждан экономикӹн сакой вӓрежӓт кычылталт кердӹт.
  •  Россий Армиштӹшӹ рядовойвлӓн дӓ офицервлӓн служымаш условим качественно лӱктӓлмӓш, военнослужащий дӓ тӹдӹн семняжӹн ӹлӹмӹ вӓр проблемӹм решӹмӓш.
  •  Военный службын социальный престижшӹм лӱктӓлмӓш, Вооруженный Вилӓн яжо имиджӹм ӹштӹмӓш. Россий Армиштӹ срочный службым эртӹшӹвлӓлӓн пакыла тыменяш, пӓшӓшкӹ пыраш дӓ граждан ӹлӹмӓштӹ кушкаш яжо условивлӓм ӹштӹмӓш.
  •  Кӹдӓлӓш школын программыш «Гражданвлӓм военный служба негӹцеш йӓмдӹлӹмӓш» предметӹм пыртымаш. Тӹнгӓлтӹш военный йӓмдӹлӓлтмӓш (ТВЙ) призывниквлӓлӓн анзыкыла Вооруженный Ви рӓдӹштӹ срочный службым эртӓш керӓл пӓлӹмӓшвлӓм дӓ моштымашвлӓм нӓлӓш веле агыл, тенгеок сӓмӹрӹквлӓм патриотизм шӱлӹш доно кушташ палша.
  •  Российӹштӹ ДОСААФ системӹм сӓмӹрӹк поколенилӓн военно-патриотический негӹцӹм пушы семӹнь виӓнгдӹмӓш.
  •  Пиш керӓл задачывлӓ доно келшӹшӹн военный профилян тыменьмӹ заведенивлӓн национальный лӱддӹмӹлыкым у гӹц ӹлӹмӓшкӹ пыртымаш.
  •  Казачествылан цилӓ шотыштат кугижӓншӹн палшыкым пумаш, тӹдӹн воинский дӓ культурный овуцавлӓжӹм угӹц ӹлӹмӓшкӹ пыртымаш. Казачий организацивлӓ сӓндӓлӹкӹн национальный лӱддӹмӹлык у системӹштӹжӹ ик тӹнг элемент, Российӹштӹшӹ Вооруженный Вин сек керӓл ресурсшы лишӓшлык ылыт.
  •  Вырсы ветеранвлӓн, тенгеок нӹнӹн доно иктӧреш шотлымы граждан категоривлӓн интерес дон праваштым перегӹмӓш. Туан сӓндӓлӹклӓн ӹнян ылмыштым пӓшӓ доно анжыктышы эдемвлӓм кугижӓншӹ шотеш пиштӹшӓшлык дӓ нӹнӹлӓн вниманим айырышашлык.

 

4. Халык экономика

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ кризисӹштӹ ылшы, но тӹнг вӓрӹм нӓлшӹ глобальный цивилизаци модель кӹшкӓреш важым колтышы социально-экономический условивлӓм кымдан вес семӹнь анжен лӓктӓш дӓ вашталташ келмӹ гишӓн шанымашеш негӹцлӓлтеш. Каеш, цӓрӓш лидӹмӹн шыкланымаш, либерально-капиталистический пайдалыкым сек тӹнгеш шотлымаш, пасна эдемвлӓ, эдем дон общество, гражданин дон кугижӓншӹ лоштышы вӓш-вӓш хир кайыш дӓ молы техень тенденци анзыкылашы историштӹ Россий халыкым цилӓ шотыштат нӱжвӓкӹлӓ нӓнгеӓт.

Мӓ шотленӓ: сӓндӓлӹкӹштӹ утларак шукы граждан верц ылшы негӹц гӹцок у экономика системӹм – халык экономикӹм ӹштӹмӹлӓ. Тидӹн годым экономикӹм пӹсӹн куштымы йӧн семӹнь анзылтен виӓнгдӹмы стратеги лишӓшлык.

 У халык экономика кушмы тӹнг корнывлӓ техень ылыт:

  • Россий гражданвлӓлӓн пӓшӓ вӓрӹм ӹштӹмӹ национальный программа. Професси квалификацим лӱктӓш яжо лӓктӹшӓн системӹм ӹштӹмӓш. Гражданвлӓлӓн пӓшӓштӹ ӹшке мыштымыштым лимӹ семӹнь яжон кычылташ дӓ пачаш йӧнӹм ӹштӹмӓш.
  • Рынкы виктӓрӹмӹ дӓ план доно вуйлатымы принципвлӓм иквӓреш кӹлдӹмӓш.
  • Экономика реальный секторын стратеги шот доно керӓл отрасльвлӓштӹжӹ план доно вуйлатымы кугижӓншӹ-корпораци йӧнвлӓн пайдан ӹштӹмӹштӹ.
  • Национальный предпринимательствылан кугижӓншӹ палшык программа, кӧргӹ рынкышты национальный предпринимательствылан утларак яжо йӧнӓн режимӹм ӹштӹмӓш. Услугым пумы, кымдан пайдаланымы товарым ӹштен лыкмы, выжалымы дӓ т. м. сферӹвлӓштӹ кӹдӓлӓш дон изи бизнеслӓн анзыл вӓрӹм пумаш. Монополи ваштареш кредӓлмӓштӹ кугижӓншӹ дон бизнесӹн пӓшӓм иквӓреш ӹштӹмӓш.
  • Национальный проектвлӓшкӹ кӹдӓлӓш дон изи бизнесӹм кымдан ушымаш.
  • Общество вецӹн производство дон пайдаланымы шот тергӹмӹм утларак виӓнгдӹмӓш. Паян дон незервлӓ лоштышы айыртемӹм изиэмдӹмӓш, халыкышты икышын дӓ тӧр ылмы принцип тӹнг ылмаш.
  • Федераци, регион дӓ производство кӱкшӹцӹштӹ халыклан социальный палшыкым пумы шотышты пайдаланымаш общественный фонд (ПОФ) гань у индикатор дон механизм системӹм ӹштӹмӓш. Общество член, социальный группа, халык слой дӓ классвлӓн социально-экономический положеништӹм изин-олен, но лимӹ семынь пӹсӹн лишемдӓш дӓ тӧремдӓш манын, ПОФ халыкын расход дон пайдаланымы структурыжы шотышты кугижӓншӹн планан пӓшӓжӹлӓн йӧнӹм ӹштӹшӓшлык. ПОФ гӹц окса дон льготывлӓ федераци дон регион бюджетвлӓн тымдымы, здоровам перегӹмӹ, халык спорт, социальный обеспечени дӓ т.м. пӓшӓлӓн расходышты семӹнь; предприяти дон производство ушемвлӓн нӹнӹн паришлӓн налогым айырыдымы социально-культурный мероприяти дӓ общественный пайдаланымаш фондышты гӹц расход семӹнь; социальный страховани дӓ аграрный сектор пӓшӓзӹвлӓн социальный обеспечени централизованный фондвлӓ гӹц расход семӹнь пуалтыт. ПОФ гӹц материальный пайда дон палшык ӓль йӓрӓ (ӓль льгота семӹнь) пуалтыт, ӓль окса тӱлӓлтеш.
  • Экономикӹн реальный секторыштыжы тӹнг организуйымы механизм – промышленностьым, наукым, разработкым, образованим ушышы кластер шотан вӓш туран ушалтшы метапромышленный системӹм ӹштӹмӓш. Техень проектвлӓм виӓнгдӹмӓшкӹ кӹдӓлӓш дон изи бизнесӹм ушымаш.
  • У йиш изи дон кӹдӓлӓш предприятивлӓм ӹштӹмӹ негӹц семӹнь технопарквлӓм, кластер зонывлӓм виӓнгдӹмӓш.
  • ОПК-шты отрасльвлӓ лоштышы кугижӓншӹ-частный метапромышленный корпорацивлӓм (кластервлӓм) целевой семӹнь ӹштӹмӓш.
  • Негӹц гӹцок у йиш промышленный отрасльвлӓм ӹштӹмӓш. Сӓндӓлӹкӹм виӓнгдӹмӹ стратеги цель доно научно-исследовательский, опытно-конструкторский дӓ технологический пӓшӓвлӓм эртӓрӓш бюджет финансированим когоэмдӹмӓш. У йиш пӓшӓшкӹ кӹдӓлӓш дон изи бизнесӹм ушымаш. У сӹнӓн пӓшӓм ӹштӹшӹ предприятивлӓлӓн налог нелӹцӹм пӱлӓэш изиэмдӹмӓш. У йиш пӓшӓлӓн ӓрӹкӹм ӹштӹмӹ гишӓн чиновниквлӓ ӹшке отвечӓйӓш тӹнгӓлӹт.
  • Демографи дон пенси проблема ваштареш ашкылвлӓ – пӓшӓ перке, автоматизаци, пӓшӓ лӓктӹш дон пӓшӓдӓр кушмаш.
  • Халык хозанлыкышты кого пашӓвлӓм ӹштӓш программан-целян йӧным кычылтмаш.
  • Яжоэмдӹмӓшӹм пӹсӹн пыртен колтымы принципӹм пыртымаш, вара цӓрнӹде яжоэмден мимӹ принципӹм кычылтмаш.
  • Налог дисциплинӹм утларак пингӹдемдӹмӓш. Налогын тӹнг нелӹцшӹм производство сфера гӹц услуга сферӹш ваштымаш. Тидӹн годым кӹдӓлӓш дон изи предпринимательство субъектвлӓлӓн фиск процедурым простаэмдӹмӓш.
  • Кугижӓншӹ-частный партнерствым утларак виӓнгдӹмӓш.
  • Спекуляци доно кӹлдӓлтшӹ финанс трансакцивлӓлӓн налогым кычылтмаш. Спекуляци капиталым производство капитал гӹц пайдаракым ӹштӹшӹ йӧнвлӓм карангдаш келеш. Тидӹлӓнжӹ кугижӓншӹ технологим вашталтымашкы дӓ виӓнгдӹмӓшкӹ инвестици толмым кымылангдышашлык.
  • Банк реформа. Банквлӓн кӱкшӹ переделан промышленностьыш кужы жепӓш инвестици доно портфельӹштӹ лишӓшлык, тидӹн гӹц пасна нӹнӹн рейтингӹштӹ валталтеш. Банквлӓм, банк продукт линейкӹвлӓм, тӹ шотышток стратеги доно керӓл областьвлӓштӹ кугижӓншӹ гаранти доно, ӹштен, кӹдӓлӓш дон изи бизнеслӓн палшаш кымылангдымаш.
  • Предприяти модернизацишкӹ инвестицилӓн дӓ айыртемӹнок кого кугижӓншӹ задачывлӓ доно ӹштӹмӹлӓн кугижӓншӹ гаранти системӹм тӹдӹм утларак кымдан кычылташ лимӹ цель доно реформируйымаш.
  • Технологим анзыкы пӹсӹн виӓнгден колтымы задачывлӓм решӓш венчур механизмӹм кычылтмаш.
  • Российӹштӹшӹ аутентичный инноваци шотышты кӧргӹ ядмашлан йӧнӹм ӹштӹмӓш. Инноваци виӓнгмӓштӹ кугижӓншӹ заказ тӹнг ылеш.
  • Нацин негӹцшӹ ылшы дӓ туан мӱлӓндӹм перегӹшӹ хресӓньӹклӓн цилӓ шотыштат палшымаш. Пасна фермер хозанлык дон коллективвлӓн ӹшкӹлӓнӹштӹ пӓшӓ продуктым ситӓрӓш цацымыштым кымылангдымаш. Маняр шукырак семнян ӹшке мӱландӹжӹ лиэш, тӹнӓр яжорак.
  • Экономикӹн аграрный секторыштыжы производственный дӓ потребительский кооперативвлӓм ӹштӓш палшымаш. Кымыланвлӓн льготан аренда негӹцеш, тӱлен нӓлӓш лимӹ права доно, мӱлӓндӹм дӓ производство мощностьым нӓлӓш йӧнӹштӹ лишӓшлык. Сола хозанлык пӓшӓм ӹштӹшӹ субъектвлӓлӓн льготан кредитӹм пумаш.
  • 1990-2000-шӹ ивлӓштӹшӹ приватизацин закон семӹнь ылмыжы шотышты ядмашым компенсаци механизмӹм шанен лыкмы дӓ кычылтмы йӧн доно решӹмӓш.

 

5. Социальный солидарность

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ шотла: яжо лӓктӹшӓн социальный кугижӓншӹн стратеги задачывлӓжӹ логӹц иктӹжӹ – гражданвлӓн ӹлӹмӓшӹштӹ шотан лижӹ манын, демократический, общество ӹшкеок тергӹмӹ, цилӓ йиш гаранти дон йӧн системӹм ӹштӹмӓш дӓ тӹдӹм соок уэмдӹмӓш.

Эдем, цилӓн интерес верц шалген, ӹшкӹлӓнжӹ ма керӓлӹмӓт ӹштӹшӓшлык. Вӓшлӓ ярыктен пингӹдемшӹ правилывлӓ семӹнь тенге ак ли гӹнь, обществышты изин-олен «цилӓн цилӓ ваштареш вырсы» тӹнгӓлеш.

Тидӹн шотышты «РОДИНА» ПАРТИ халык икышын ылмым обществышты ладна дӓ яжо ӹлӹмӓшӹн ик негӹцшӹ семӹнь анжа. Кугижӓншӹ, гражданвлӓ лошты вӓш-вӓш палшык уке гӹнь (ти шамакын тӹрӹс анжыктымыжы доно, ик сӓндалык эдем агылеп гӹнь), халыкым иктӹш ушен дӓ анзыкыла виӓнгмӹ корнышкы лӓктӹн ак керд.

 Мӓ шотлена, халык икышын ылмы тӹнг приципвлӓ техень ылыт:

  •  Кугижӓншӹ дон бизнесӹн труйышывлӓн праваштым тӹшлӹмӹ шотышты вӓшлӓ вуйын шалгымаш.
  •  Коррупци дон казнам шолыштмы хоть-махань кайыш ваштареш пыт кредӓлмӓш, взяточник, вымогатель дӓ шолывлӓлан цилӓ кӱкшӹцӹштӹ наказаним – граждан правам курымеш чӹдемдӹмӹ якте (професси доно ӹштӓш срокде цӓрӹмӹм пыртымаш, кугижӓншӹ должностьым йӓшнӓш курымеш права гӹц пасна кодымаш дӓ т.м.) – пингӹдемдӹмӓш.
  •  Пӓшӓм пушы дон пӓшӓзӹ лошты вашт кайшы дӓ законодательствым пингӹдӹн тӹшлӹмӓшеш негӹцлӓлтшӹ вӓш кӹл. Пӓшӓ этикӹм ӹшке интерес гӹц кӱшкӹ шӹндӹмӓш.
  •  Труйышывлӓн интересӹштӹм тӧрӧк анжыктышы дӓ перегӹшӹ семӹнь, лачок ирӹкӓн профессиональный ушемвлӓм виӓнгдӹмӓш.
  •  Пенсионер, ӹлӓлшӹ вырсы ветеран, инвалид, незерӹн ӹлӹшӹ молы гражданин группывлӓлӓн палшымы шотышты ядмашвлӓ доно кугижӓншӹ, власть дӓ бизнесӹн пӓшӓм иквӓреш ӹштӹмӓш, эдемвлӓн шотан ӹлӹмӓшӹштӹлӓн йӧнӹм ӹштӹмӓш.

 ЦЫМЫР РОССИЙӸШТӸШӸ «РОДИНА» ПОЛИТИКА ПАРТИ Россий Федераци Конституциштӹ пингӹдемдӹмӹ социальный кугижӓншӹн принципвлӓжӹм перегӓш дӓ виӓнгдӓш келмӹ гишӓн шанымашеш негӹцлӓлтеш. Гражданинӹн яжо дӓ йӓрӓ образовани дон медицина палшык, пӓшӓ, сакой социальный палшык, шотан пенси, ӹшке ӹлӹмӓшлӓн лӱдӹш уке ылмым дӓ ӹшке товырам закон доно перегӹмы шотышты конституци прававлӓжӹ – социальный кугижӓншӹн негӹцшӹ, кыды ӹнянӹдӹмӓшӹм лыкшашлык агыл. Ти социальный гарантивлӓ обществышты иктӹ-весӹ доно келшен ӹлӹмӹм дӓ сӓндӓлӹкнӓн яжон виӓнгмӹжӹм анжыктат.

Кугижӓншӹ, неолибералвлӓн тымдымышты семӹнь, «социальный ответственностьын уты грузшым» шуэн колтышашлык агыл, гражданвлӓлӓн социальный палшык шотышты частный дӓ кугижӓншӹ интересӹм шотыш нӓлшӹ яжо лӓктӹшӓн у системӹм ӹштӹшӓшлык.

Кугижӓншӹштӹ социальный солидарность дон социальный ответственность – лачокшы национальный патриотизмӹн, власть дон общество цаткыды ик цела ылмын негӹцӹштӹ, каждый гражданинӹн шотан дӓ яжо ӹлӹмӓшӹжӹн пиш керӓл условижӹ.


III. ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН ЦЕЛЬ ДОН ЗАДАЧЫВЛӒЖӸ:

 1. ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН тӹнг дӓ приоритетный цельвлӓжӹ.

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН тӹнг цельжӹ – Россий халыкым перегӓш, виӓнгдӓш дӓ шукемдӓш. Ти цельӹш шоаш манын, мӓлӓннӓ кымда обществын кымылжым ӹшке векӹнӓ сӓрӓш дӓ политика кредӓлмӓштӹ сӹнгӓш келеш.

Партин приоритетный цельвлӓжӹ:

  •  Политический нацим ӹштӹмӓш, вес семӹньжӹ, Россий Федераци халыкым кушкын толшы лӱдӹшвлӓ дӓ цӹлт у, сӓндӓлӹкӹн анзыкылашыжылан лӱдӹшӹм кандышы нелӹвлӓ анзылны ушымаш.
  •  Россий обществыштышы сакой социальный группывлӓн интересӹштӹм вӓш-вӓш келӹштӓрӓш манын, соок ӹштӹшӹ переговор механизмӹм негӹцлӹмӓш; кугижӓншӹ дон общество лоштышы вӓш ответственность системӹм ӹштӹмӓш.
  •  Россий Федерацин цилӓ субъектшӹ иктӧр ылмы принципӹм перегӹмӓш, нӹнӹм социально-экономически анзыкыла виӓнгдӹмӓш.
  •  Сӓндӓлӹкӹн экономикӹжӹм виӓнгдӹмӹ концепцим тӹрӹс ӹлӹмӓш коммерциализаци гӹц хозанлык пӓшӓ лӓктӹш социализацишкӹ вашталтымаш.

 

2. ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН тӹнг задачывлӓжӹ:

  •  Обществын политика ӹлӹмӓштӹжӹ гражданвлӓн политика кымылыштым куштымы дӓ Россий Федерациштӹ лачокшы демократим ӹштӹмӹ пӓшӓ доно участвуйымаш.
  •  Интересвлӓм вӓш келӹштӓрӹмӹ общенациональный системӹм ӹштӓш дӓ Россий халыкым ик политика нацишкӹ ушаш келмӹ гишӓн цилӓ закон йӧн дӓ средство доно ынгылдарымы пӓшӓ.
  •  Гражданвлӓм политика шотышты тымдымаш дӓ воспитывайымаш, общественный шанымашым ӹштӹмӓш, халыклан «РОДИНА» ПАРТИН Программа положенивлӓжӹм дӓ молы документшӹм, тенгеок сакой ядмаш доно Партин позицижӹм ынгылдарымаш.
  •  Общественный ӹлӹмӓшӹн хоть-махань ядмашыжы доно российӹштӹшӹ гражданвлӓн шанымышты доно пӓлдӓрӹмӓш, ти шанымашым кымда общественность, кугижӓншӹ власть дон вӓрӹштӹшӹ самоуправлени органвлӓ якте шоктымаш.
  •  Граждан обществышты «РОДИНА» ПАРТИН позицижӹм пингӹдемдӹмӓш.
  •  Российӹштӹшӹ гражданвлӓлӓн шотан ӹлӹмӓшӹм ӹштӓш дӓ пайдаштым цӓрнӹде кушташ манын, сакой региональный дӓ федеральный общественный организацивлӓлӓн ушнашышты палшымаш.
  •  Социальный инфраструктурым, гражданвлӓлӓн яжо лӓктӹшӓн социальный палшык системӹм анзыкыла виӓнгдӹшӹ экономика механизм дон принципвлӓм шанен лыкташ дӓ ӹлӹмашкӹ пырташ палшымаш.
  •  Кугижӓншӹ власть дон вӓрӹштӹшӹ самоуправлени органвлӓн депутатыш дӓ молы айырымы должностьыш кандидатвлӓм (кандидат спискӹвлӓм) пумаш, анжыктымы органвлӓшкы айырымашты дӓ нӹнӹн пӓшӓштӹштӹ участвуйымаш.
  •  Партин программыштышы цельжӹм шокташ манын, кугижӓншӹ властьын законодательный (представительный) органвлӓштӹжӹ дӓ вӓрӹштӹшӹ самоуправленин представительный органвлӓштӹжӹ фракци, депутат группа дӓ депутатвлӓн пӓшӓштӹм вӓш-вӓш келӹштӓрӹмӓш.

ЦЫМЫР РОССИЙӸШТӸШӸ «РОДИНА» ПОЛИТИКА ПАРТИН пӓшӓжӹ ӹшке кымыл, иктӧр ылмы, законым тӹшлӹмӹ дӓ виш ылмы принципвлӓэш негӹцлӓлтеш. Парти ӹшке кӧргӹ структурыжым, цельжӹм, пӓшӓ форма дон йӧнвлӓжӹм, федеральный закон доно пӓлдӹртӹмӹ ограниченивлӓ гӹц пасна, айырен нӓлмӓштӹ ирӹкӓн ылеш.


Мӓ ӹняненӓ, ик корпоративный, социальный ӓль политический группат пасна ӹшкетӹн кӹзӹтшӹ лӱдӹш ваштареш шалген дӓ сӓндӓлӹклӓн яжо анзыкылашым ӹштен ак сӹнгӹ. Тидӹм Россий Федерацин общенациональный патриотизм идеологи дӓ вӓш келӹштӓрӹмӹ социально-политический интерес доно ушнышы халыкшы веле ӹштен кердеш.

 

ТУАН СӒНДӒЛӸКӸН АНЗЫКЫЛАШЫЖЫ МӒ ГӸЦНӒ ШАЛГА!

ПӒШӒМ ӸШТӒШ ДӒ СӒНДӒЛӸКӸМ ПЕРЕГӒШ ЙӒМДӸ ЛИ!!

РОССИЙЛӒН СЛАВА!!!

 

Мы в социальных сетях